حسبي الله ونعم الوكيل فيكي يامصر

طول عمري بقول انك يامصر ملكيش ذنب وان الذنب ذنب الناس اللي مبهدلينك معاهم

بس اللي شفته بعنيه خلاني اقول اكيد انا اللي غلط وكل الناس ديه صح
اكيد انا اللي مبفهمش
وهيا اصلا البلد ايه غير محصلة الناس اللي فيها

امبارح شفت آلاف الشباب بيهتفوا باسمك يامصر
شفتهم وانا سايق في شارع الهرم وعلى غفله ومن غير مقدمات المتش اللي البلد كلها وقفت عشانه خلص (وانا مش مدي خوانه) وفجأه الهرم كله بأه ناس

شفت ناس بتهتف باسمك يامصر, ايوه بيهتفوا باسمك وهما بيولعوا سجاير ملفوفه وبيوزعوا مخدرات عليهم
بيهتفوا باسمك وهما واقفين وبكل بلطجه مانعين العربيات تمشي واللي راجع من شغله يتنيل على عين اهله ويقف

حسبي الله ونعم الوكيل فيكي يامصر
حسبي الله ونعم الوكيل في كل واحد نزل في الليله ديه عشان يأذي الناس
حسبي الله ونعم الوكيل في الرتب بتوع الداخليه اللي كانت واقفه على شارع العريش والهرج ده كله ادامهم ومحركوش ساكن
حسبي الله ونعم الوكيل في التحرش اللي كان ادام هارديز ومسرح الزعيم والعريش وعز الدين عمر
حسبي الله ونعم الوكيل في البنات اللي مشموش ريحة التربيه ووقفوا في نص الشارع بيرقصوا
حسبي الله ونعم الوكيل في كل بنت سافله رمت نفسها ادام العربيات واتمسحت بكل قذاره في ازاز العربيات. بتدوري على ايه؟ عريس؟ اطمني هتلاقي في الزحمه ديه كتير, ونقي واختاري, اللي بيشرب واللي بيشم واللي...
حسبي الله ونعم الوكيل في كل واحد كان سايق وسايب اولاده وبناته طاعلين من الشبابيك بمنظر أقل مايقال عنه سفاله وانعدام ربايه
حسبي الله ونعم الوكيل في من خلاني ادوس بنزين في وسط الزحمه واخبط في البلطجيه عشان يوسعوا
حسبي الله ونعم الوكيل في كل اللي كانوا بيترقصوا وبيولعوا نار وقال ايه عشانك يامصر
حسبي الله ونعم الوكيل في اللي خلا المصريين والجزائريين اعداء
حسبي الله ونعم الوكيل في كل مسؤل من اكبر كبير لأقلهم شأنا واللي هيتسأل يوم القيامه عن التغييب والضياع اللي الناس فيه
حسبي الله ونعم الوكيل في اللي مشغل أغاني شاديه الصبح في المترو الساعه 8 والناس رايحه الشغل وهيا بتقول ياحبيبتي يامصر يامصر وكأن مفيش انجاز أعظم من الفوز في متش
حسبي الله ونعم الوكيل في اللي خلا النشيد الوطني بأه أغنية نانسي عجرم لو انت زفت مصري

وخليني اقولك يابلدي مبروك عليكي. مبروك عليكي آلاف الشباب الضايع الفاقد الصايع اللي بيتحرش واللي بيترقص واللي بيدلع واللي بيتمرقع واللي بيشرب واللي بيشم واللي بيصاحب واللي ملوش مستقبل
مبروك عليكي يامصر
وفي الزحمه ديه مش مهم لو خسرتي واحد زيي, وايه المشلكه؟ فيه غيره كتير بيهتفوا باسمك

من كل قلبي بقولها
حسبي الله ونعم الوكيل

كلام على جنب
احترمت كلمته وهدفه
http://ahmedmekki.com/up/Ahmed.Mekki.Fo2o.Official.website.mp3

التيك اواي وسنينه

http://api.ning.com/files/m3*dnN7Yj*RYdDqupjSlAE03iEaz8r92N4fw6eh7OWAmUljdqKO6i2CPMggVYh2jkgGh1AmCGmrhpvroFCXecgGCEXLR0CNc/NoticeBoardPin.jpg

التيك اواي اتحول من مجرد ظاهره لثقافه
التيك اواي دخل في كل حاجه في حياتنا مش في الأكل بس
زمان كنا واخديه موضه. كان الواد صميده لما يحب يتنطط على جرجاوي وسبع الليل (ولاد عمه) يقولهم انا هاخد تيك اواي ولا حتى دليفري
الله يرحم جدك ياصميده, كان بيقعد على الحصيره ويدلدل رجليه

المهم

التيك اواي دخل في كل تفاصيل حياتنا
حاجه سريعه, طعمها من بره حلوه وجميل, ملهاش فوايد وبتملى على الفاضي وبتضر كمان

بص كده في حياتنا هتلاقيه في كل حاجه

هتلاقيه في الأكل, من بره هللا هللا من جوه يعه يعه. فين البركه بتاعة الأكل والناس اللي تتلم حوالين سفره واحده بعد يوم طويل؟ ابحث عنها في مكان اخر يمكن تلاقيه

هتلاقيه في الشغل, ناس بتشتغل ورايحين جايين وشكلهم يقولك انهم بيعملوا اللي عليهم وزياده شويتين, بس مفيش انتاج

هتلاقيه في الفن, جرب شغل الراديو, ممكن تسمع اكتر من 200 اغنيه في ربع ساعه, وايه بأه, موسيقى وميكروفونات وناس وفلوس وعالم كتيره ولا انت فاهم مين قال لمين ايه وليه!!!

هتلاقيه في علاقات الناس مع بعض, تشوف ناس تحس انهم اصحاب وبيموتوا في بعض, وعند أول ملف صميده ميعرفش اخوه

هتلاقيه في الحب, ناس بتحب ناس وتحس انه حب قيس لليلى, بس في الحقيقه تلاقيه حب تيك اواي, هوا بيحب فيها انها مزه وهيا بتموت في انه مز, مز ومزه هيجيبوا ايه؟ اكيد جيل ملهوش طعم

هتلاقيه في الكتب, كلام كتير وكتب شكلها جميل وصور وسطور وطباعه, بس في الحقيقه كلام ملوش معنى ولا طعم

هتلاقيه في الكوره, متش الناس كلها واقفه عليه ورئيس ساب كل حاجه وبيسأل عن الفريق عامل ايه, ومصريين وجزائريين بيكرهوا بعض, وامن وفلوس وغيره وغيره, بس في الحقيقه كله بيلعب على كله, ولا ليها اي طعم

حاسس بالتيك اواي في حياتنا؟

كلام على جنب
If you don't understand my silence, you don't deserve my words

صميده رئيس جمهوريه

 

 

لو صميده بقى رئيس جمهوريه هيعمل ايه
نشوف كده أول نشرة الأخبار بعد ماصميده قعد على الكرسي وشرب المعسل بتاعه وظبط دماغه

صرح مسؤل كبير جوي جوي جوي يابوي انه من الآن فصاعدا سيتم تنفيذ خطه -قال ايه- جديده عشان نواجه الأزمه اللي بيجولوا عليها ديه

وطبعا وحتما ولابد الالتزام بالخطه. واللي مش هيلتزم هنبلغ عنه جرجاوي وزير الداخليه عشان يحط السيخ المحمي في جفاه

نبدأ بالطيران
بيجولوا ان الطيران كتر اوي وان الواحد من دول واخد السكه من هنا لبلاد بره قياسه
وده ياحلوين مينفعش, وعشان نوفر في تمن الطيران وفي نفس الوقت نعمل فردات زياده قررنا تعيين كل سواقين الميكروباصات اللي شغالين على خط بولاق امبابه في مصر للطيران. السواق من دول يعملوا في اليوم الواحد اربع فرد كده وهوا مريح وحاطط رجل على رجل والجوزه جنبه
وطبعا السواق من دول هيركب اربعه في الكنبه اللي ورا

الأكل
بيجلوك ان احنا بنصرف على الأكل ياما, وده من حقنا, لكن قال ايه الناس طالعه في التقليعه الجديده بتاعة التيك اوااااااااااااي. لأ لأ مينفعش وعشان نربي جيل يقدر يشيل الهباب والطين وميقولش أي, هنقلب كل محلات التيك أواااااااي ديه لمسامط وهنخلي الدليفري لحد باب اوضة نومك
يلا خلي الشعب يعيش ودكاتره الجلطات يشتغلوا

بالنسبه لوزارة الصحه
نما الى مسامعنا في الفتره الأخيره ان نسبة الفرافير في البلد زادت جوي جوي يابوي. ليييييه؟ قال ايه بيقولك بيجيلهم انفلوسا. ياض انت وهوا داحنا زمان كان العيل يتولد وعنده البري بري والسكاربوتو ويقوم يجري زي الوحش ولا حد يهمه. والست من دول كانت تبقى حامل في الشهر الأربعين وشايله في بطنها دسته عيال وتنزل الصبح تلم الدوده من قفا الفلاحين في الأرض
شوفوا بجي من هنا ورايح هنرجع للطبيعه, مفيش دوا ومسخره ديه
كل يوم الصبح وانت نازل تضرب طبق الفول المتين ومعاه بصلتين وتومايه, وجري على شغلك. وهتبجوا زي الفل كلكم بعد أسبوع واحد

الاعلام
من دلوقتي وانت طالع وداخل مفيش مسخره الفيدو كليبات والمرقعه ديه, خلاص زمن الرداله ابتدى
نرجع بأه لفن الربابه والتحطيب بتاع زمن الرداله, والفاصل هيكون حلقه من مسلسلكم اللي بتحبوه "التار ولا العار ياجبيصي"

الدفاع
الجيش هيبقى 15 سنه واجباري على الكل كليله
وهندخل سلاح النبابيت وهنعمل سلاح النبوت الطائر وصاعقة الغيط

المواصلات
التك تك في الأحياء والجمل في المناطق الواعره
واللي هنلمحه راكب عربيه ولا حتى بينضفها هنطخه بالمراكيب لغاية مايبانله صاحب
واللي هنشوفه ماشي في الشارع ولا على كوبري قصر النيل ومعاه حرمه من اللي بنشوفهم اليومين دول, هع هع هع, مجلكوش عل اللي هيحصله
عشان اللي هيحصله مينفعش يتجال


الرياضه
من هنا ورايح مفيش المتشات المايعه بتاعتكم
المتشات كلعها هتتلعب في الجبل
والفريج هيكون 70 لاعب مسلحين بالبنادج عيار 1000 ملي وخرطوشتين رصاص حي لزوم الخطط
والماتش هيتلعب تلات ايام واربع ليالي
والفريج اللي هيتغلب هنرميه للمطاريد والديابه
والحكام دوليين من كفر الزعبلاوي وابو راسين

الأحوال الشخصيه
الواد من دول لما يوصل سن 19 سنه لازمن يتجوز, واللي مش هيتجوز هنجوزه احنا بمعرفتنا
بلاش صياعه ودوران على حل شعره
والحرمه اللي هتطلب احمر ولا ابيض من جوزها, هنجوزها لواحد من الغفر الخصوصي بتاعنا
وذنبكم على جنبكم

فاصل ومش هنواصل
اجفل التلفزيون ياض منك له عشان النهارده خلص
اجفل

إتكلم

في ايه ياناااااااااااااااااااااااااااااس

كشفت راسي ودعيت عليكم في ساعه فجريه
اعمل فيكوا ايه يعني بس؟
ايه اللي انتوا بتعملوه ده؟

المره ديه انا بكتب ومن غير تجهيز, يعني اللي هكتبه هتقروه ومن غير لوك لوك

انا عارف انا كل واحد حر في مدونته
بس كده مينفعش
كده احنا بنتفق اننا ندمر اجمل حاجه عشنا عليها في السنه اللي فاتت

فين الشعارات الجميله "اتكلم عشان اشوفك, اتكلم عشان اسمعك, اتكلم عشان احس بيك"

من امتى التدوين عندكم بقى عبء؟
من امتى المدونات بقت مهجوره كده؟
من امتى فقدنا التنوع الفكري والموضوعات والخناقات؟
من امتى بقينا أرواح بتتحرك من غير صوت ولا نفس ولا حرف (بلاش حرف ديه عشان ده اسم شركتنا)؟

ايه افلستم فكريا؟ معتقدتش, بس اللي انا شايفه انكم حبيتوا الحزن وبتنكشوا عليه بمنكاش
من موقعي هنا هبلغ عنكم شرطة المدونات
هقدم بلاغ في كل واحد فيكم كنت بستمتع عنده وحرمني من المتعه ديه؟
هقدم بلاغ في كل واحد هجر مدونته؟
هقدم بلاغ في كل واحد قفل مدونته؟
هقدم بلاغ في كل واحد قفل باب المناقشه في مدونته وخلاها كلام ماشي في اتجاه واحد بس؟
هقدم بلاغ في كل واحد خرج عن حدود الأدب في تدوينه وحرمني من زيارته؟
هقدم بلاغ في كل واحد حول مدونته لصفحه اعلانات وياريته بيكسب من وراها سحتوت؟

احترمكم كلكم واعزكم كلكم بس ده انا شايفه مش صح, ولا نقفل بأه ونروح أحسن
لو التدوين عبء عليك, خد اجازه بس ارجع تاني
لو التعليقات كلها مجاملات ورأي واحد, ده في حقيقته حب واحترام بين الناس بلاش نقفله
لو الرد على التعليقات حمل عليك, متردش عليها او رد بس على الرأي اللي تحس انه محتاج مناقشه
بس نقفل الدنيا ويبأه كل واحد بيتكلم ومش عايز يحس بغيره؟ غريبه ديه شويه

الأخوه اللي زعلانين ومحبوطين ويائسين, الدنيا كلها مش كده
قولولي وانا اشتريلكم بربع جنيه زغازيغ من اي حته ونقعد وهاتك ياضحك

انا مش هذكر اسماء, لانكم بسم الله ماشاء الله, كترتوا اوي ومش عارف هزغزغ مين ولا مين

كلام على جنب
مقدرش ادخل النت من غير ماازوركم ولو كلامي زغلكم معلش حقكم عليا

ياحلاوتك ياستفندي يابن عم البرتقال

السلام خيار استراتيجي

ألا تمن كيلو الخيار دلوقتي كام؟

------------------

حماس تتهم فتح بالخيانه وفتح تتهم حماس بالطمع في السلطه
 

لو حد فاكر ياريت يفكرني, هيا فلسطين ديه فين؟

------------------

المصريين بيكرهوا العراقيين, والعراقيين بيكرهوا الكويتين, والكويتين بيكرهوا السودانين, والليبين بيكرهوا السعوديين, والأردنين بيكرهوا اليمنيين
 

أهلا بيك في جامعة الدول (العربيه)

------------------

احنا مش بنبني لدلوقتي, احنا بنبني للأجيال القادمه!!!
 

ليه يارب مجتش في الأجيال القادمه

------------------

ياريس السلحفاه ديه بيقولوا هتعيش 200 سنه
 

هنشوف

------------------

جمال مبارك يؤكد عدم امكانية التوريث في مصر
 

طبعا ياريس احنا هنختارك لوحدنا ومن غير ماحد يقولنا, ااااااااااااااااه ياقفايا

------------------

قرار شيخ الأزهر: لو انتي منتقبه مش هتخشي مدينة الطالبات بتاعة الأزهر
 

القرار بشكل تاني: لو انتي مهشتكه, مفيش قانون يمنعك من دخول أي مكان

------------------

مصر مهدده بمرض انفلونزا الخنازير
 

لو الفيروس ده دخل جسم المصري هيلاقي بلاوي تانيه كتير وهياخد على قفاه وهيترمي في الزباله

------------------

أصدر الدكتور حاتم الجبلي وزير الصحة في مصر قرار رقم 377 بمنع انتشار 'الدعارة' وأنفلونزا الخنازير داخل أندية اللياقة
 

المتغطي بيكم عريان, واللي يمشي وراكم توهان

------------------

عمي انا عايز اخطب بنتك
 

وماله يابني, ادام الموضوع خطوبه بس

------------------

بابا حماده صاحبي عايز يجي يزورنا في البيت
 

وماله يابنتي انا أب متفتح وبحب كل حاجه تبقى في النور
 

بابا حماده عايز يتقدملي
 

نعم ياختي, ازاي؟ معاه شقه ومهر ووظيفه محترمه وعربيه, ياكده يامينفعش

وعزة نفسي منعاني

http://images.clipartof.com/small/11172-A-White-Horse-Standing-On-Its-Hind-Legs-While-Rearing-Up-In-Defense-Clipart-Illustration.jpg

قوم ياعم المتبعتر من على الأرض ولم أنفاسك
قومي ياست هانم من على الرصيف وبلاش شغل الشحاتين ده

بيقولك قال ايه عملتله خدي مداس, طب ملازم يمرمطك ويدوس عليك
الظاهره اللي بنتكلم عنها اختفاء عزة النفس عند ناس كتير وفي مواقف كتير, في الشغل, في السياسه, في العلاقات اللي بين الناس

عمر مافيه علاقه أو هدف يخليك تتخلى عن عزة النفس, عشان لو عملتها مره هتندم عليها كتييييييييييييييييييييييير

بص حواليك, كام واحد شفته أو لسه بتشوفه اتخلى عن عزة نفسه, ياترى شكله ايه دلوقتي, كام واحد حافظ عليها والناس فهمته غلط واتهمته بالكبرياء والغرور

لما ترجع للتاريخ, تلاقي ان الشخصيات العظيمه اللي الناس بتستشهد بيها في كلامهم دايما تحس في كلامهم كده بحاجه مش معتاده, حاجه غريبه, ناس تقول ده بايع الدنيا, وناس تقول ده جنون قوه, بس كتير منها بيكون بالفعل عزة نفس, شوف سيدنا أبو بكر الصديق في حروب الرده, قال فيما معناه لو منعوني عقال كانوا بيدفعوه ايام الرسول هحاربهم عليه, شوف سيدنا عمر بن الخطاب وهو مهاجر يخرج في وسط النهار ويقولهم انا مهاجر واللي عاوز امرأته ترمل أو ابناؤه ييتموا يحولوا بينه وبين الهجره
دول ناس عزة نفسهم مستمده من دينهم, من كرامتهم

شوف في العصر الحديث, ايام حرب أكتوبرلما الملك فيصل قطع مد البترول وقال قولته الشهيرة "عشنا وعاش اجدادنا على التمر واللبن وسنعود لهما"
ولما كسينجر وزير خارجية أمريكا حب يداعبه ويتثنيه عن قراره وقاله "إن طائرتي تقف هامده في المطار, بسبب نفاد الوقود, فهل تأمرون جلالتكم بتموينها, وانا مستعد للدفع بالأسعار الحره ؟" (من مذكرات هنري كيسنجر 1973) راح رد عليه وقاله "وأنا رجل طاعن في السن, وامنيتي أن اصلي ركعتين في المسجد الاقصى قبل أن أموت فهل تساعدني على تحقيق هذه الأمنيه؟!"
جاب منين الحجه القويه في الكلام؟ 

من عزة النفس

تعالوا بأه في الأيام ديه وخد عندك مثال اللي بيموت في الدباديب بينسى تماما عزة النفس. والحجه أني بحب, ازاااااااااااااااااااااااي؟ هوا الحب بتاعك ده ذل وتلطيش وبس؟ ايه كله ضرب ضرب مفيش شتيمه؟

ده حتى في الفن
تسمع اللي بيقول
تيجي متجيش انا كده كده راضي, حبيبي مستني وهفضل انادي

ليه ان شاء الله واقف انا على ميكروباص بنده بولاق امبابه ولا ايه يعني؟
محسسني ان اللي بيحب ده كمسري في اتوبيس عمال ينده تذاكر تذاكر

مسمعتش الست وهيا بتقول
بدي أشكيلك من نار حبي بدي أحكيلك علّ في قلبي
وأقولك عالّي سهرني وأقول لك عالّي بكاني
وأصورلك ضنى روحي وعزة نفسي منعاني

مسمعتش الناس هيصت ازاي في الحفله ديه وعجبهم اوي الكلام واتمزجوا وقالوا الله الله ياست

خد عندك بأه في السياسه وغيرها وغيرها وغيرها
واللي جوا مش أحلى من اللي بره

لو عزة نفسك معاك مش هيجيلك غير واحد يحترم فيك ده, ولو عزة نفسك مش معاك مش هيجيلك غير واحد بيدور على جزمه ضايعه أو كلب بيشمشم على لقمه مرميه جنب الحيط

حكمة البوست
مبيجريش ورا الشبشب غير حافي
ولا ايه؟

ضد مجهول؟ تفتكروا فعلا انه مجهول؟

بوست نشرته قبل كده بس لقيت انه لازم يتنشر تاني
الهدف من اعادة النشر هو التذكير ومقاومة اعلام بيسوق ان العلم والنجاح من نصيب العالم المتحضر فقط اللي بالطبع احنا مش فيه

ديه قائمه منقوله نصا (انا جمعتها فقط) من مصادر مختلفه متاحه للجميع. القائمه ديه عشان نعرف ان في يوم كان عندنا ثروات ولو مكانتش ثروات بجد مكانوش استهدفوها وقتلوها
زي ما قلت الهدف اني اواجه ناس كفرت بفكرة حضارتنا الحقيقيه وناس بتعتقد ان التقدم في التقليد الأعمى للآخر بكل شئ مناسب وغير مناسب لنا
القائمة طويله فيها مصريين ولبنانين وسعودين
يعني الثروه عندنا مهياش حكر على جنسيه
ديه حضارة شعوب

 

المصادر:

http://amrkhaled.net/articles/articlesprint3329.html
http://ar.wikipedia.org/wiki/

 

تعالوا نقرا ونتعلم
1- الدكتور يحيي المشد 

الدكتور يحيى أمين المشد من مواليد عام 1932. قضى حياته في الإسكندرية، وتخرج في كلية الهندسة قسم كهرباء، جامعة الإسكندرية عام 1952، بُعث إلى الاتحاد السوفييتي لدراسة هندسة المفاعلات النووية عام 1956، ثم أسند إليه القيام ببعض الأبحاث في قسم المفاعلات النووية بهيئة الطاقة النووية في مصر، وسافر إلى النرويج عامي 1963 و1964 لعمل بعض الدراسات، ثم انضم بعد ذلك للعمل كأستاذ مساعد, ثم كأستاذ بكلية الهندسة بجامعة الإسكندرية. وأشرف الدكتور المشد في فترة تدريسه بالكلية على أكثر من 30 رسالة دكتوراه ، ونُشر باسمه خمسون بحثاً علميًّا، تركزت معظمها على تصميم المفاعلات النووية ومجال التحكم في المعاملات النووية

في مطلع 1975 كان صدام حسين نائب الرئيس العراقي وقتها يملك طموحات كبيرة لامتلاك كافة أسباب القوة؛ فوقّع في 18 نوفمبر عام 1975 اتفاقاً مع فرنسا للتعاون النووي . من هنا جاء عقد العمل للدكتور يحيى المشد العالم المصري, والذي يعد من القلائل البارزين في مجال المشروعات النووية وقتها، ووافق المشد على العرض العراقي لتوافر الإمكانيات والأجهزة العلمية والإنفاق السخي على مشروعات البرنامج النووي العراقي

وفي الثالث عشر من يونيو (حزيران) عام 1980 وفي حجرة رقم 941 بفندق الميريديان بباريس عُثر على الدكتور يحيى المشد جثة هامدة مهشمة الرأس وقُيدتْ القضية ضد مجهول

2- الدكتورة سميرة موسى

كانت عالمة مصرية في ابحاث الذرة وتلميذة للدكتور على مصطفى مشرفة سافرت لامريكا وكانت تنوى العودة لمصر لكي تستفيد بلدها من ابحاثها حيث انها كانت تستطيع انتاج القنبلة الذرية بتكاليف رخيصة

و تلقت عروضاً لكي تبقى في أمريكا لكنها رفضت بقولها: " ينتظرني وطن غالٍ يسمى مصر ".

وقبل عودتها بأيام استجابت لدعوة لزيارة معامل نووية في ضواحي كاليفورنيا في 15 أغسطس . وفي طريق كاليفورنيا الوعر المرتفع ظهرت سيارة نقل فجأة لتصطدم بسيارتها بقوة وتلقي بها في وادي عميق. قفز سائق السيارة واختفى إلى الأبد, وأوضحت التحريات أنه كان يحمل اسماً مستعاراً, وأن إدارة المفاعل لم تبعث بأحد لاصطحابها

3- العالم سمير نجيب

يعتبر العالم سمير نجيب عالم الذرة المصري من طليعة الجيل الشاب من علماء الذرة العرب، فقد تخرج من كلية العلوم بجامعة القاهرة في سن مبكرة، وتابع أبحاثه العلمية في الذرة. ولكفاءته العلمية المميزة تم ترشيحه إلى الولايات المتحدة الأمريكية في بعثة، وعمل تحت إشراف أساتذة الطبيعة النووية والفيزياء وسنه لم تتجاوز الثالثة والثلاثين, وأظهر نبوغاً مميزاً وعبقرية كبيرة خلال بحثه

عرضت عليه اغراءات كثيرة بالبقاء في امريكا ولكنه قرر العودة الى مصر

وفي مدينة ديترويت وبينما كان الدكتور سمير يقود سيارته والآمال الكبيرة تدور في عقله ورأسه، يحلم بالعودة إلى وطنه لتقديم جهده وأبحاثه ودراساته علىالمسؤولين، ثم يرى عائلته بعد غياب .

وفي الطريق العام فوجئ الدكتور سمير نجيب بسيارة نقل ضخمة، ظن في البداية أنها تسير في الطريق شأن باقي السيارات. حاول قطع الشك باليقين فانحرف إلى جانبي الطريق لكنه وجد أن السيارة تتعقبه. وفي لحظة مأساوية أسرعت سيارة النقل ثم زادت من سرعتها واصطدمت بسيارة الدكتور الذي تحطمت سيارته ولقي مصرعه على الفور, وانطلقت سيارة النقل بسائقها واختفت، وقُيّد الحادث ضد مجهول.

4- دكتور نبيل القليني

قصة هذا العالم غاية في الغرابة، فقد اختفى منذ عام 1975 وحتى الآن، كان هذا العالم قد أوفدته كلية العلوم في جامعة القاهرة إلى تشيكوسلوفاكيا للقيام بعمل المزيد من الأبحاث والدراسات في الذرة. وقد كشفت الأبحاث العلمية الذرية التي قام بها عن عبقرية علمية كبيرة تحدثت عنها جميع الصحف التشيكية . ثم حصل على الدكتوراه في الذرة من جامعة براغ.

وفي صباح يوم الاثنين الموافق 27/1/ 1975 دق جرس الهاتف في الشقة التي كان يقيم فيها الدكتور القليني, وبعد المكالمة خرج الدكتور ولم يعد حتى الآن

5- الدكتور نبيل احمد فليفل

نبيل أحمد فليفل عالم ذرة عربي شاب، ا ستطاع دراسة الطبيعة النووية, وأصبح عالماً في الذرة وهو في الثلاثين من عمره ،

وعلى الرغم من أنه كان من مخيم "الأمعري" في الأراضي الفلسطينية المحتلة، فقد رفض كل العروض التي انهالت عليه -وفي الخفاء وعن طريق الوسطاء– للعمل في الخارج, وكان يشعر أنه سيخدم وطنه بأبحاثه ودراساته العلمية.

وفجأة اختفى الدكتور نبيل, ثم في يوم السبت الموافق 28/4/1984 عثر على جثته في منطقة "بيت عور ", ولم يتم التحقيق في شيء

6 - الدكتور العلامة على مصطفى مشرفة

مفخرة المصريين تتلمذ على البرت اينشتين وكان اهم مساعديه في الوصول للنظرية النسبية واطلق عليه اينشتاين العرب

وعثر على د. مصطفى مشرفة مقتولا في 15 يناير عام 1950 بطريقة بدائية للغاية بالسم

يذكر أن أينشتاين الذي كان يجلس في محاضرات مشرفة ويتابع أبحاثه - قد نعاه عند موته قائلا : "لا أصدق أن مشرفة قد مات ، إنه لا يزال حياً من خلال أبحاثه".

7- الدكتور جمال حمدان

أهم جغرافي مصري، وصاحب كتاب "شخصية مصر ". عمل مدرسا في قسم الجغرافيا في كلية الآداب في جامعة القاهرة، وأصدر عدة كتب إبان عمله الجامعي. تنبأ بسقوط الكتلة الشرقية قبل 20 عاما من سقوطها، وألف كتاب " اليهود أنثروبولوجيا" يثبت فيه أن اليهود الحاليين ليسوا أحفاد اليهود الذين خرجوا من فلسطين .

وفي سنة 1993 عثر على جثته والنصف الأسفل منها محروقاً , واعتقد الجميع أن د. حمدان مات متأثراً بالحروق, ولكن د. يوسف الجندي مفتش الصحة بالجيزة أثبت في تقريره أن الفقيد لم يمت مختنقاً بالغاز, كما أن الحروق ليست سبباً في وفاته, لأنها لم تصل لدرجة أحداث الوفاة

و اكتشف المقربون من د. حمدان اختفاء مسودات بعض الكتب التي كان بصدد الانتهاء من تأليفها, وعلى رأسها كتابة "اليهودية والصهيونية", مع العلم أن النار التي اندلعت في الشقة لم تصل لكتب وأوراق د. حمدان, مما يعني اختفاء هذه المسودات بفعل فاعل .

وحتى هذه اللحظة لم يعلم احد سبب الوفاة ولا اين اختفت مسودات الكتب التي كانت تتحدث عن اليهود

8- دكتورة سلوى حبيب

كان عنوان كتاب الدكتورة سلوى حبيب الأخير " التغلغل الصهيوني في أفريقيا ", والذي كان بصدد النشر, مبرراً كافياً للتخلص منها. د. سلوى حبيب الأستاذة بمعهد الدراسات الأفريقية.

عثر عليها مذبوحة في شقتها, وفشلت جهود رجال المباحث في الوصول لحقيقة مرتكبي الحادث ليظل لغز وفاتها محيراً, خاصة أنها بعيدة عن أي خصومات شخصية وأيضاً لم يكن قتلها بهدف السرقة, ولكن إذا رجعنا لأرشيفها العلمي سنجد ما لا يقل عن ثلاثين دراسة في التدخل الصهيوني في دول أفريقيا على المستوى السياسي والاقتصادي والاجتماعي , وبشهادة الجميع كانت هذه النقطة من الدراسة ملعبها الذي لا يباريها أحد

9- الدكتور سعيد سيد بدير

كلنا يعلم الفنان الراحل سيد بدير ولكن ليس معظمنا يعرف ان له ابنا كان عالما فذا في هندسة الصواريخ

تخرج في الكلية الفنية العسكرية وعين ضابطا في القوات المسلحة المصرية حتى وصل إلى رتبة مقدم وأحيل إلى التقاعد برتبة عقيد بناء على طلبه بعد أن حصل على درجة الدكتوراه من إنجلترا ثم عمل في أبحاث الأقمار الصناعية في جامعة ليزيزع الألمانية الغربية وتعاقد معها لأجراء أبحاثه طوال عامين وهناك توصل المهندس الشاب من خلال أبحاثه إلى نتائج متقدمة جعلته يحتل المرتبة الثالثة على مستوى 13 عالما فقط في حقل تخصصه النادر في الهندسة التكنولوجية الخاصة بالصواريخ0

رفض الجنسية كما رفض كل من سبقوه ورفض البقاء وقرر العودة فزادت التهديدات فعاد الى وطنه ليحموه وذهب الى زيارة اقاربه بالاسكندرية

وهناك قتل

والمصيبة انهم ادعوا انه مات منتحرا

يظهر الراجل ده كان مصر على الانتحار فقطع شرايينه وفتح انبوبة البوتاجاز ورمى نفسه من الدور ال 13 يعني المطلوب بس كلام يدخل العقل

10- العالم اللبناني رمال حسن رمال

أحد أهم علماء العصر في مجال فيزياء المواد كما وصفته مجلة لوبوان، التي قالت أيضا إنه مفخرة لفرنسا كما تعتبره دوائر البحث العلمي في باريس السابع من بين مائة شخصية تصنع في فرنسا الملامح العلمية للقرن الحادي والعشرين.

جاءت الوفاة في ظروف مريبة حيث حدثت في المختبر ووسط الأبحاث العلمية التي تحدثت عنها فرنسا، كما جاءت الوفاة عقب وفاة عالم أخر هو الدكتور حسن كامل صباح. لم يستبعد وجود أصابع خفيه وراء الوفاة التي تتشابه مع وفاة العالم حسن صباح في عدم وجود آثار عضوية مباشرة على الجثتين

11- الدكتور حسن كامل صباح (اديسون العرب )

يصل عدد ما اخترعه حسن كامل الصباح من أجهزة وآلات في مجالات الهندسة الكهربائية والتلفزة وهندسة الطيران والطاقة إلى أكثر من 176 اختراعًا

وقد حدثت الوفاة المفاجئة مساء يوم الأحد 31 مارس 1935 وكان حسن كامل الصباح عائدًا إلى منزله فسقطت سيارته في منخفض عميق ونقل إلى المستشفى، ولكنه فارق الحياة وعجز الأطباء عن تحديد سبب الوفاة خاصة وأن الصباح وجد على مقعد السيارة دون أن يصاب بأية جروح مما يرجح وجود شبهة جنائية خاصة

12- الدكتورة السعودية سامية عبد الرحيم ميمني

كان لها اكبر الأثر في قلب موازين عمليات جراحات المخ والأعصاب، كما أنها جعلت من الجراحات المتخصصة الصعبة جراحات بسيطة سهلة بالتخدير الموضعي

عرض عليها مبلغ من المال والجنسية الاميركية مقابل التنازل عن بعض اختراعاتها, ولم يكن المبلغ بسيطا بل كان العرض خمسة ملايين دولار اميركي إضافة للجنسية الاميركية ورفضت العرض

واستمرت الدكتورة سامية في دراستها وإنجاز أبحاثها ولم يصبها اليأس إلى أن حلت الفاجعة الكبرى عندما نشرت محطة ال CNN صورا لجثة الدكتورة الشهيدة وقد تعرف عليها أهلها عن طريق الصدفة لمشاهدتهم هذه القناة التي بثت الواقعة وصور الدكتورة سامية ميمني, حيث قتلت خنقا في شقتها ووجدت جثتها في أحدى المدن الاميركية داخل ثلاجة عاطلة عن العمل

 

ضد مجهول؟ تفتكروا فعلا انه مجهول؟